HABARLAR
TÜRKMENISTANYŇ ULAG-KOMMUNIKASIÝA TOPLUMYNYŇ ÖSÜŞI: ÝYLYŇ BIRINJI ÝARYMYNDAKY ÝOKARY GÖRKEZIJILER
Türkmenistanyň Ministrler Kabinetiniň 14-nji iýulda geçirilen giňişleýin mejlisinde ýylyň birinji ýarymynda ýurdumyzyň ulag-kommunikasiýa toplumynda ýerine ýetirilen işleriň we hyzmatlaryň ösüşi 124,8 göterime barabar boldy diýlip habar berildi. Bu görkezijiler awtomobil, demir ýol, howa, deňiz we derýa ulaglarynda ýük daşamak pudagynda 103,1 göterime, ýolagçy gatnatmakda 105,7 göterime barabar boldy.
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň hasabatyna görä, ýanwar—iýun aýlarynda hyzmatlaryň ösüş depgini «Türkmendemirýollary» agentliginde 105,4 «Türkmenawtoulaglary» agentliginde 120,4 göterime ýetdi. Görkezilen döwürde «Yutong ZK6128BEVG» we «Kamaz-6282» kysymly elektrobuslar, «JAC E-J7» elektromobiller, şeýle hem olar üçin zarýad beriji enjamlar satyn alyndy we Arkadag şäherinde ulanmaga berildi. Mundan başga-da, şu güne çenli ýüzden gowrak «Toyota Coaster» we «Toyota Hiace» orta hem-de mikroawtobus satyn alyndy we ýurdumyza getirildi.
«Türkmenhowaýollary» agentligi ösüş babatda öňe saýlandy, bu pudakda ösüş 291,4 göterime barabar boldy. Onuň mümkinçiligini ýylyň birinji ýarymynda satyn alnan we ulanmaga berlen iki sany Airbus A330-200P2F ýük uçary hasam güýçlendirer. Aşgabat—Seul—Aşgabat, Aşgabat—Hanoý—Aşgabat täze ugurlaryň açylmagy ýük daşamagyň çäginiň giňeýändigine şaýatlyk edýär.
«Türkmendeňizderýaýollary» agentliginde görkeziji 108,9 göterim boldy. Ýylyň birinji ýarymynda Türkmenbaşy halkara deňiz portunyň dünýäniň «Ýaşyl portlary» sanawyna girizilmegi bilen baglanyşykly degişli işler geçirilmegi netijesinde «EcoPorts» halkara güwänamasyna eýe boldy.
Halkara üstaşyr ulag geçelgesinde Türkmenbaşy Halkara deňiz portunyň barha artýan ähmiýetini göz öňünde tutup hormatly Prezidentimiz Serdar Berdimuhamedow onuň kuwwatlyklaryndan doly we netijeli peýdalanmagyň möhümdigini, deňiz we derýa ýük daşaýyş möçberini köpeltmegiň, daşary ýurtlara ugurlar boýunça täze hyzmatlary teklip etmegiň mümkinçiliklerini öwrenmegiň zerurdygyny nygtady.