HABARLAR
TÜRKMENISTANLY PÄLWANLAR GAZAGYSTANDA GEÇIRILEN GUŞAK GÖREŞI BOÝUNÇA DÜNÝÄ ÇEMPIONATYNDA 11 MEDAL GAZANDYLAR
Türkmenistanly türgenler Astanada erkekleriň we zenanlaryň arasynda geçirilen XXI dünýä guşak göreş çempionatynda 11 medal gazandy.
Gazagystanyň paýtagtynda geçirilen bu abraýly ýaryşlara 30 ýurduň wekili gatnaşdy. Dünýä çempionatyna gatnaşan biziň toparymyz 16 pälwandan ybarat bolup, olaryň 11-i 4 altyn, 4 kümüş we 3 bürünç medal gazandylar.
Iň ýokary baýraklara Türkmen döwlet bedenterbiýe we sport institutynyň talyplary Hojamyrat Suhanow (agram topary 57 kg çenli), Atageldi Tejendurdyýew (68 kg çenli), Agaýusup Garaýew (74 kg çenli) we Lebap welaýatyndan türgen Rozmyrat Medow (82 kg çenli) dagy mynasyp boldular.
Ýaryşda ikinji orny erkekler ýaryşynda Ahal welaýatyndan Arslan Hojamberdiýew (90 kg çenli) we Türkmen döwlet bedenterbiýe we sport institutynyň talyplary Annagurban Allaberdiýew (90 kg çenli) bilen Nobatgeldi Nazarow (100 kilograma çenli), zenanlar ýaryşynda bolsa Lebap welaýatyndan Jemal Öwlüýägulyýewa (65 kg çenli) eýelediler.
Erkekleriň arasyndaky ýaryşda Lebap welaýatyndan Guwanç Hemraýew (68 kg çenli) we Türkmen döwlet bedenterbiýe we sport institutynyň talyby Nurmuhammet Baýdogdyýew (100 kg-dan ýokary), zenanlaryň arasynda bolsa Lebap welaýatyndan Zarina Abdyrahmanowa (58 kg çenli) bürünç medal gazandylar.
Dünýä çempionatynyň dowamynda biziň türgenlerimize Türkmen döwlet bedenterbiýe we sport institutynyň mugallymy Nuraly Lollukowdan, Türkmenistanyň Bedenterbiýe we sport baradaky döwlet komitetiniň esasy hünärmeni Begmyrat Saparlyýewden we Türkmenistanyň Guşak göreşi federasiýasynyň işgäri Çarymyrat Akmämmedowdan ybarat tälimçiler toparynyň wekilleri uly kömek etdiler.