HABARLAR
TÜRKMENISTANYŇ AGYR ATLETIKAÇYLARY HINDISTANDA GEÇIRILEN ÝAŞLAR WE ÝETGINJEKLER AZIÝA ÇEMPIONATYNDA 25 MEDAL GAZANDYLAR
Ýaşlaryň (17 ýaşa çenli) we ýetginjekleriň (20 ýaşa çenli) arasynda Delide (Hindistan) geçirilen Aziýa çempionatynda türkmen agyr atletikaçylary 10 sany altyn, 9 sany kümüş we 6 sany bürünç, jemi 25 medal gazandylar.
Birinjilik baýraklary ugrunda 21 ýurtdan birbada iki ýaş toparynda 260-dan gowrak türgen bäsleşýär. Biziň ýurdumyzdan ýaryşa 11 türgen gatnaşýar, olaryň ýedisi ýurdumyza medal bilen gaýdyp gelerler.
Türkmenistanyň toparyna alty altyn medaly Änamjan Rustamowa getirdi. Paýtagtdaky “Olimp” sport mekdebiniň 11-nji synp okuwçysy bu üstünlige 81 kilograma çenli agram toparynda ýetginjekleriň (17 ýaşa çenli) we gyzlaryň (20 ýaşa çenli) arasynda geçirilen bäsleşikde silterläp götermekde (103 kg), itekläp galdyrmakda (125 kg), ikisiniň jeminde bolsa (228 kg) göterip, üç altyn medal gazanmak bilen ýetdi.
Bir ýyl ozal Daşkentde geçirilen şunuň ýaly Aziýa çempionatynda Änamjan Rustamowa ikinji orundan ýokary çykyp bilmändi. Indi bolsa tutuş yklymda birbada iki ýaş toparynda iň gowy türgen boldy.
Änamjan Rustamowa agyr atletika bilen Daşoguz welaýatynyň Gurbansoltan eje etrabynda ilkinji tälimçisi Deripbaý Kerimbaýewyň ýolbaşçylygynda meşgullanyp başlapdy. Häzirki wagtda bolsa 17 ýaşa çenli gyzlaryň arasynda Türkmenistanyň milli ýygyndysynyň baş tälimçisi Gurbandurdy Amanowyň ýolbaşçylygynda paýtagtymyzda ussatlygyny artdyrýar.
Türkmen döwlet bedenterbiýe we sport institutynyň 2-nji ýyl talyby Şahzadbek Mätýakubow (96 kilograma çenli) hem ýaryşda üç altyn medal gazanyp, ýetginjekleriň arasynda geçen ýaryşda üç gezek hormat sekisiniň iň ýokary basgançagyna çykdy – silterläp galdyrmak (160 kg), itekläp galdyrmak (197 kg) we jeminde (357 kg).
Türkmen döwlet bedenterbiýe we sport institutynyň 3-nji ýyl talyby Gaýgysyz Töräýew ýetginjekleriň arasynda 81 kilograma çenli agram toparynda itekläp götermekde 178 kg, silterläp götermekde 147 kg, jemi 325 kg göterip, bir altyn we iki kümüş medal gazandy.
Perhat Bagtyýarow (61 kilograma çenli) Türkmenistanyň toparynyň gapjygyna dört medal getirdi. Paýtagtymyzyň “Olimp” sport mekdebiniň 8-nji oktýabrda 17 ýaşy doljak 11-nji synp okuwçysy silterläp götermekde 112 kg, itekläp götemekde 144 kg we jeminde 256 kg götermek bilen ýigitler ýaryşynda üç kümüş medal gazandy we ýetginjekleriň arasynda parallel hasaplaşykda bürünç medala mynasyp boldy.
Mary şäheriniň ýöriteleşdirilen orta mekdebiniň 11-nji synp okuwçysy Gülälek Kakamyradowa (64 kg çenli) gyzlaryň ýarysynda (17 ýaşa çenli) silterläp götermekde 79 kg, itekläp götermekde 96 kg, jeminde 175 kg göterip, iki kümüş we bir bürünç medal gazandy.
Türkmenistanyň Döwlet serhet gullugynyň esgeri Resul Rejebow (89 kilograma çenli) ýetginjekler bäsleşiginde Aziýanyň wise çempiony boldy. Ol silterläp götermekde 148 kg, itekläp götermekde 170 kg, ikisiniň jeminde bolsa 318 kg galdyrmak bilen, iki kümüş, bir bürünç medala mynasyp boldy.
Gyzlar ýaryşynda (17 ýaşa çenli) bu ýaş toparynda dünýä çempiony Aşgabat şäherindäki 104-nji orta mekdebiň 9-njy synp okuwçysy Ogulşat Amanowa (45 kg çenli) silterläp götermekde 65 kg, itekläp götermekde 80 kg we ikisiniň jeminde 145 kg götermek bilen, üç sany bürünç medal gazandy.
Ýaşlaryň we ýetginjekleriň arasynda agyr atletika boýunça Aziýa çempionaty 5-nji awgustda tamamlanar.