INNOWASION TASLAMALAR BÄSLEŞIGI – “SANLY ÇÖZGÜT – 2023”

“Sanly çözgüt – 2023” innowasion taslamalar bäsleşigi baradaky Düzgünnama neşir edildi. Resminama alty bölümden ybarat bolup, birinji bölümde bäsleşigiň maksatlary kesgitlenýär. Onda “Türkmenistanda 2019 – 2025-nji ýyllar üçin sanly ykdysadyýeti ösdürmek ýörelgesine” laýyklykda “Türkmenaragatnaşyk” agentliginiň “Sanly çözgüt – 2023” atly innowasion taslamalar bäsleşigini geçirýändigi bellenýär. Onuň maksady milli ykdysadyýetde durmuşa geçirmäge giň mümkinçiligi bolan programma üpjünçiligini işläp düzmek we oýlap tapyşlar bilen meşgullanýan ýaşlary ýüze çykarmak, höweslendirmek, şeýle hem ýurdumyzyň sanly ekosistemasynyň ösüşine goşant goşýan täze başlangyçlary ýola goýmakdyr.

Bäsleşigiň umumy düzgünleri ikinji bölümde beýan edilýär: ol hödürlenýän işlere bolan talaplary öz içine alýar. Hususan-da, taslamanyň ähmiýetini we ony önümçilige, şol sanda aragatnaşyk we telekommunikasiýa ulgamynyň ösüşi üçin-de girizmegiň mümkinçiligini, ykdysady ähmiýetini esaslandyrmak, şeýle hem kiberhowpsuzlyk we dizaýn bilen baglanyşykly taslamanyň beýleki aýratynlyklaryny görkezmek zerurdyr.

Resminamanyň üçünji bölüminde beýan edilen Bäsleşik düzgünlerine laýyklykda, oňa ýekelikde we toparlaýyn gatnaşmaga rugsat berilýär (toparyň agza sany 3-den geçmeli däldir we onuň ýolbaşçysy kesgitlenmelidir). Şol ýerde-de bäsleşige gatnaşjaklaryň tabşyrmaly resminamalarynyň sanawy berlen. Bäsleşige gatnaşýanlaryň resminamalary “Türkmenaragatnaşyk” gullugy tarapyndan 2023-nji ýylyň 20-nji oktýabryna çenli hasaba alnar, netijeler bolsa XIV Halkara serginiň we “Turkmentel – 2023” ylmy konferensiýanyň çäginde jemlener.

Bäsleşigi geçirmegiň tertibi we guramaçylyk komitetiniň işi baradaky dördünji bölümde onuň ýedi ugur, ýagny saglygy goraýyş; ylym we bilim; ulag we logistika; elektron senagaty; oba hojalygy; hyzmatlar we robot ýasama pudagy boýunça geçiriljekdigi aýdylýar. Bu ugurlar boýunça hödürlenen taslamalara baha bermek üçin degişli ministrlikleriň we bölümleriň hünärmenleri gatnaşarlar.

Bäsleşige gatnaşjaklary hasaba almak üçin arzalar we oýlap tapyşlar baradaky teklipler elektron görnüşinde telekom.tm internet saýtynda kabul edilýär.

Bu resminama, şeýle hem resminamalaryň doldurylyş nusgalary we käbir ölçegler boýunça taslamalara baha berlişi döwlet dilinde doly görnüşde şu  salgy boýunça elýeterlidir. 

Innowasion taslamalar bäsleşigi – “Sanly çözgüt – 2023” (turkmenistan.gov.tm)