AGYR ATLETIKAÇY GÜLNABAT KADYROWA V YSLAM RAÝDAŞLYGY OÝUNLARYNYŇ ÇEMPIONY BOLDY

Agyr atletikaçy Gülnabat Kadyrowa Türkiýäniň Konýa şäherinde geçirilýän V Yslam raýdaşlygy oýunlarynda iki altyn we bir bürünç medal gazanyp, çempion boldy.

Türkmenistanyň at gazanan tälimçisi Ahmet Saryýewden tälim alýan Gülnabat Kadyrowa 71 kg . çenli agramda silterläp 107 kg. altyn, itekläp 118 kg. göterip, bürünç medal eýeledi we jemi 225 kg. netije bilen altyn medal eýeledi, şeýlelik-de Yslam raýdaşlygy oýunlarynyň çempiony boldy we Yslam raýdaşlygy oýunlarynyň iki rekordyny goýdy.

Bu ýeňiş Gülnabadyň Yslam raýdaşlygy oýunlarynda gazanan ikinji üstünligidir. Bakuwda geçen öňki oýunda ildeşimiz 69 kg. çenli agramda çykyş etmek bilen azerbaýjanly Anastasiýa Ibragimliden 5 kg az göterip, 214 (99+115) kg. netije bilen ikinji orny eýeläpdi. 2017-nji ýyldaky Yslam raýdaşlygy oýunlarynyň ýeňijisi azerbaýjanly türgeniň doping ulanandygy sebäpli ol ýaryşdan çykaryldy we Gülnabat Kadyrowa birinji orun berildi.

Alty ýyl mundan ozal Gülnabat Rio-de-Žaneýroda geçirilen Olimpiada ilkinji gezek gatnaşyp, 69 kg. çenli agramda 195 (90+105) kg. göterip, 13-nji orna düşüpdi. Geçen ýyl Daşkentde geçirilen Aziýa çempionatynda 71 kg çenli agramda 223 (102+121) kg. göterip, ikinji orna mynasyp boldy.

Häzirki wagtda Gülnabat Kadyrowa Daşoguz welaýatynyň Gurbansoltan eje adyndaky 1-nji sport mekdebinde tälimçi bolup işlemek bilen agyr atletika boýunça çykyşlaryny utgaşykly alyp barýar.

21 ýaşly agyr atletikaçy Türkmen döwlet bedenterbiýe we sport institutynyň talyby Döwranbek Hasanbaýew Türkmenistanyň toparyna ýene bir medal getirdi. Ol 96 kg. çenli agramda silterläp 165 kg. netije bilen kiçi kümüş baýraga mynasyp boldy.

Döwranbek itekläp 183 kg ştanga göterip, jemi 348 kg. netije bilen bolsa dördünji orna düşdi.

https://turkmenistan.gov.tm/tk/habar/65520/agyr-atletikacy-gulnabat-kadyrowa-v-yslam-raydaslygy-oyunlarynyn-cempiony-boldy