TÜRKMENISTANYŇ KIKBOKSING BOÝUNÇA MILLI ÝYGYNDY TOPARY V YSLAM RAÝDAŞLYGY OÝUNLARYNDA ALTY MEDAL EÝELEDILER

Türkmen kikboksçylary Türkiýäniň Konýa şäherinde geçirilýän V Yslam Raýdaşlygy oýunlarynda medallaryň altysyny mynasyp boldular.

Medallaryň 31 toplumy ugrunda full-kontakt (erkekleriň arasynda 10, zenanlaryň arasynda 6 agram derejede) we lou-kik (erkekleriň arasynda 11, zenanlaryň arasynda 4 agram derejede) geçirilen bäsleşiklerde kikboksçylaryň 14-isi Türkmenistana wekilçilik etdiler.

Garşydaşyň aýaklaryna depilse-de, dyzyna we injigine depmek gadagan edilýän lou-kik görnüşinde ildeşlerimiz jemi dört – 1 altyn, 2 kümüş we 1 bürünç medala mynasyp boldular.

81 kg. çenli agramda Serdar Mämmedow finalda gazagystanly Ruslan Stepanowdan rüstem geldi. Özbegistanly Nurbek Urişboýew we türkiýeli Fatih Erman bürünç medala eýe boldular.

Türkmenistanyň milli ýygyndy toparyndan Atajan Atamyradow (54 kg. çenli) we Gülzada Joragulyýewa (65 kg-den agyr agramda) kümüş medaly eýelediler. 

67 kg. çenli agramda Muhammet Altybaýew bürünç medaly eýeledi.

Kikboksingiň nokaut ediji doly galtaşykly urgulara rugsat berilýän ugry bolan full-kontaktda ildeşlerimiz Omargeldi Nurgeldiýew (54 kg. çenli) we Hajymyrat Geldimämmedow (89 kg. çenli agramda) milli ýygyndy toparymyza bürünç medal getirdiler.

https://turkmenistan.gov.tm/tk/habar/65607/turkmenistanyn-kikboksing-boyunca-milli-yygyndy-topary-v-yslam-raydaslygy-oyunlarynda-alty-medal-eyelediler