PAGTA ÝYGYMY MÖWSÜMINIŇ DEPGINI: DAŞOGUZ WELAÝATY

Şu ýyl Daşoguz welaýatynda gowaça ekilen 140 müň gektar ýerden 230 müň tonna pagta hasylyny almak göz öňünde tutulýar. Ýöriteleşdirilen ýokary öndürijilikli tehnikalaryň, şol sanda pagta ýygyjy kombaýnlaryň giňden işe girizilmegi ýygymyň güýçli depginini saklamaga ýardam berýär. 

Obasenagat toplumy üçin hormatly Prezidentimiz Gurbanguly Berdimuhamedowyň görkezmesi boýunça täze tehnikalar gelip gowuşýar, olaryň ähli nusgalary ýurdumyzyň toprak-howa şertlerinde deslapky synagdan geçirilýär. Häzirki wagtda ekin meýdanlarynda pagta ýygyjy kombaýnlaryň ýüzlerçesi işledilýär, olar pagtaçylara ýetişdirilen hasyly öz wagtynda ýygnap almaga şert döredýär. 

Sebitde has iri pagta öndüriji bolan S.Türkmenbaşy etrabynyň ekerançylary ýygymyň öňdebaryjylarynyň hatarynda barýarlar. S.A. Nyýazow adyndaky we Görogly etraplarynyň daýhanlary hem ýygymda olardan yza galanoklar. 

Welaýatda ekin meýdanlarynda peýdalanylýan tehnikalara gije-gündiziň dowamynda tehniki hyzmat etmek, zähmet öndürijiligini ýokarlandyrmak, mehanizatorlaryň we pagta ýygymyna beýleki gatnaşyjylaryň doly derejeli dynç almagy üçin zerur şertler döredilipdir. 

Türkmenistanyň Halk Maslahatynda kabul edilen “Oba hojalyk pudagynda özgertmeleri mundan beýläk-de kämilleşdirmek hakyndaky” Karar ekerançylaryň zähmet öndürijiligini mundan beýläk-de ýokarlandyrmagyna itergi berdi. Onda oba hojalygyna hususy önüm öndürijileri giňden çekmek, şeýle hem ýer-suw serişdelerini rejeli peýdalanmak ýaly birnäçe çäreler göz öňünde tutulýar. Olaryň hatarynda oba hojalyk önüm öndürijilerini goşmaça höweslendirmek hem-de bugdaýyň we pagtanyň döwlet satyn alyş, strategik ähmiýetli oba hojalyk ekinlerini ýetişdirmek bilen baglanyşykly kärhanalaryň hyzmatlarynyň nyrhyny ýokarlandyrmak ýaly çäreler bar. 

Welaýatda pagtaçylyk pudagyny mundan beýläk-de ösdürmek üçin oňat mümkinçilikler bar. Munuň şeýledigine soňky ýyllarda bu sebitde gurlan iri ýokary tehnologiýaly önümçilikler, şol sanda Daşoguz şäherindäki her ýylda 16,6 müň tonnadan gowrak pagta süýümini hem-de 14,5 müň tonna aýratyn isleg bildirilýän ýokary hilli «Ring» kysymly nah ýüplük öndürýän kärhana, Köneürgenç etrabynda ýylda 6 müň 700 tonna süýüm işläp çykarýan we 6 müň tonna ýokary hilli ýüplügi öndürmäge niýetlenen toplum, şeýle hem bu etrapda her ýylda kuwwaty 40 müň tonna tohum serişdesini gaýtadan işlemäge ukyply ýöriteleşdirilen kärhana we 10 müň tonna pagtany saklamak üçin pagta kabul ediji bölüm we beýlekiler hem şaýatlyk edýär.