«MFT» KOMPANIÝASY MIWE SUWLARYNYŇ WE GAPLANAN GÖK ÖNÜMLERIŇ EKSPORTYNY ARTDYRÝAR

«MFT» (Maks food technology) kärhanasy miwe suwlarynyň we şerbetleriň, miwe mürepbeleriniň, duza ýatyrylan we gaplanan garyşyk gök öňnümleriň ýigrimä golaý görnüşini çykarýar.

Daşoguzly welaýatynyň telekeçileri häzir ýurtda konserwantlary, reňkdir ys berijileri ulanman, tebigy önüm çykarýan ýeke-täk önüm öndürijilerdir. Telekeçi Myrat Allaýazowyň aýtmagyna görä, «MFT» kärhanasynyň önümleriniň ählisi gümrük bileleşiginde sertifikatlaşdyrylan, gümrük birleşiginiň ТР ТС 021/2011 Tehniki reglamentiniň talaplaryna laýyk gelýär we ЕАС- sertifikatyny aldy.

Kompaniýa arassa önüm üçin tehniki şertleriň, görkezmeleriň we önüm taýýarlaýyş usullarynyň kyrka golaýyny işläp taýýarlady. S. Nyýazow etrabynyň S. Rozmetow adyndaky daýhan birleşiginde işleýän kiçi zawod Gollandiýanyň gök-miwe önümleri arassalamaga, ýuwmaga, Awstriýanyň miwe suwlaryny göni sykma arkaly öndürmäge, Ukrainanyň üwmeç we maýonez çykarmaga niýetlenen döwrebap enjamlary bilen üpjün edilen.

Göni sykma arkaly miwe suwlaryny öndürmek üçin ulanylýan çig malyň hiline berk gözegçilik edilýär. Bişen miweler we gök önümler ýagşy saýlanylýar, ýuwulýar, owradylýar we basylýar. Miwe suwlary süzülenden soň zyýansyzlandyrylyp arassalanan aýna gaplara salynýar, soňra önümiň mikrobilogik howpsuzlygyny we peýdaly sypatlaryny aňryçäk derejde saklap galmagy üpjün edýän aýawly düzgünde pasterizirlenýär.

Telekeçileriň önümlerine ýurduň iri söwda merkezleriniň ählisinde uly isleg bildirilýär. Şu ýyl çykarylýan önümleriň görnüşini artdyrmak göz öňünde tutulýar. Kärhanada alma, käşir, alma-käşir, kädi, nar, şugundur miwe suwlary hem-de şerbetleri, şeýle hem tomat souslarynyň üç görnüşi, badamjandyr bolgar burçundan assorti, leço, gök önümler ikrasynyň birnäçe görnüşi çykarylar.

Geçen ýylyň ahyrynda daşoguzly telekeçiler tebigy miwe suwlarynyň we şerbetleriň onlarça tonnasyny Russiýa Federasiýasyna eksport etdiler. Şu ýyl onuň möçberi artdyrylar. Munuň üçin Fransiýadan bag in box ekologiýa taýdan arassa paketler, Türkiýeden – ýörüte howpsuzlyk klapanly twist-off gapaklar satyn alnar. Miwe suwlaryny we önümleri gaplamak üçin ýurdumyzda öndürilýän aýna gaplar ulanylýar.