TÜRKMEN PARLAMENTARILERI SEULDA IŞ SAPARY BILEN BOLDULAR

Mejlisiň deputatlary halkara hyzmatdaşlygy hem-de parlamentara gatnaşyklary ösdürmek maksady bilen duşuşyklara, maslahatlara, okuw maslahatlaryna hem-de beýleki çärelere gatnaşýarlar. Milli parlamentiň wekiliýetiniň 27 — 31-nji oktýabrda Koreýa Respublikasyna bolan iş saparynyň barşynda dostlukly ýurduň dürli edaralarynyň ýolbaşçylary hem-de wekilleri bilen birnäçe duşuşyklary geçirildi.

Türkmen parlamentarileri milli Liderimiz Gurbanguly Berdimuhamedowyň oňyn tejribäni öwrenmek babatda tabşyrygyny ýerine ýetirmek üçin Seul döwlet uniwersitetiniň işi bilen tanyşdylar. Ýokary okuw mekdebinde bolan duşuşygyň dowamynda ylym-bilim ulgamynda, bilelikdäki taslamalary durmuşa geçirmekde ýola goýlan ikitaraplaýyn gatnaşyklary berkitmäge bolan taýýarlyk bellenildi.

Wekiliýet halkara gazna baryp gördi, bu gazna dünýäniň 60-dan gowrak ýurdunda 180-e golaý merkezi özünde jemleýär. Şeýle hem Koreýa Respublikasynyň Milli Ýygnagynyň spikeri bilen duşuşyk geçirildi. Onda parlamentara gatnaşyklaryň häzirki ýagdaýyna hem-de olary mundan beýläk-de ösdürmegiň mümkinçiliklerine garadylar.

Koreýa Respublikasynyň Premýer-ministriniň orunbasary, bilim ministri bilen bolan duşuşygyň barşynda bilim ulgamynda ikitaraplaýyn gatnaşyklaryň geljegi, hususan-da, Aşgabatda Koreý okuw merkezini açmak meselesi ara alnyp maslahatlaşyldy.