HABARLAR
ERKGALA MERWIŇ IŇ GADYMY GALASYDYR
Gadymy Merw ady bilen tanalýan arheologiýa ýadygärlikleri Marydan 30 kilometr gündogarda, Murgap derýasynyň jülgesinde ummasyz ýerinde ýerleşýär.
Binalarynyň köp bölegi ýykylan diwarlary bolan şäherleriň her biri öz döwründe: Erkgala miladydan öňki VI asyrda, Gäwürgala miladynyň III asyrynda, Gyzgala VI, Soltangala XI, Abdylla han gala XV asyrda pajarlap ösüpdir.
Erkgala barada tanymal arheolog Wadim Mihaýlowiç Masson: «Soňy bilen Parfiýa Merwiniň daýanjy bolan Erkgala şäheri 16 gektar meýdany tutupdyr, ol çig kerpiçden gurlan galyňlygy 60 metre golaý diwar bilen gurşalypdyr, onuň merkezinde kaşaň binalar bolupdyr. Täze gazuw-agtaryş işleri bu şäheriň has gadymy medeni gatlaklarynyň azyndan miladydan öňki VI asyra degişlidigini görkezdi» – diýip ýazypdyr. Bu ýerden tapylan köp sanly teňňeler alyma şeýle netijä gelmäge mümkinçilik beripdir.
Erkgalanyň diwarlary gurlanyna ýüzlerçe ýyllar geçse-de, häzirem öňki belentligine galypdyr. Ol beýleki galalardan saýry gelýär. Häzirki wagtda diňli diwarlarynyň beýikligi 25 – 29 metre ýetýär.
Daşyndan göräýmäge Erkgalanyň girelgesi ýok ýaly görünse-de, ol günorta tarapyndaky depede ýerleşipdir.