BITARAPLYK GÜNI MYNASYBETLI SURAT SERGISI

Türkmen suratkeşleri ýurdumyzyň Bitaraplyk gününi uly döredijilik galkynyşy bilen garşylaýarlar: paýtagtymyzyň Sergi merkeziniň iki gatyny-da hünärmenleriň we sungat söýüjileriň gyzyklanmasyny döredýän suratlar dolduryp dur.

Mende serginiň birinji gatyndaky «Siren» we «Üç ýoldaş» atly iki surat beýlekilerden beter täsir galdyrdy. Kerim Orazberdiýew «Siren» suratyny fotorealizm usulynda çekipdir. Dup-dury suwda siren gülüniň baldagy bulguryň gyraňlaryna görä yzygiderli üýtgäp dur. Mundan başga-da, suratkeş öz eserine gözelligi we terligi «ornaşdyrmagy» başarypdyr, olar sergä gelýänleriň nazaryny özüne maýyl edýärler.

Berdisähet Gurbansähedowyň «Üç ýoldaş» atly suraty gaty gyzykly. Awtor häsiýetleri üýtgeşik, ýöne wepaly dostluk bilen birleşen üç dostuň ýüz keşbini suratlandyrypdyr. Berdisähet suraty käbir ýerlerde takyry ýada salýan ýukajyk ohra bilen «astarlapdyr», ähtimal, awtor şeýtmek bilen, dostlaryň çöle dahyllydygyny nygtandyr. Bu surat mata ýüzündäki her bir gahrymanyň psihologik häsiýeti we gyzykly görnüşi bilen özüne çekýär.

Rahman Omarow özüniň «Mukam» atly täze eserini sergide görkezdi. Kiçijik oglanjyk joşgunly ylham bilen gadymy saz guraly – tüýdük çalmak hünärini öwrenýär. Suratda ähli zat: ýaş sazandanyň täsirli oturyşy, reňkleriň sünnälik bilen utgaşmasy, polotnonyň dikligi gözelligiň ýüze çykyşyna tabyn edilipdir.

Beýleki suratlaryň sazlaşykly gözelliginiň ýerliginde Gurban Babatäjowyň «Göreş» eseri olara gapma-garşy görünýär. Nakgaş bu suratda iki sany ýyrtyjynyň arasynda gazaply göreş pursadyny janlandyrypdyr.

Sergä gelenleri Täjigül Gurbanowanyň «Garagum şemalynyň ertekileri» diýen şahyrana atly tematik keçäni sergileýän eseri-de geň galdyrdy. Suratkeşiň ulanan açyk reňkleri haýran galdyryjy bolsadylary «gür berýän» ýeliň öwüsginini örän takyk şekillendirýär. Suratkeş bu keçäni çagalar üçin «Garagum şemalynyň ertekileri» atly operany goýmagy niýet edinen, emma durmuşa geçirmäge ýetişmedik görnükli kompozitor Rejep Rejebowa bagyşlapdyr.

Polat Mämiýew sergide goýan heýkelini «Türkmen medeniýetiniň hazynalary» diýip atlandyrypdyr. Nury Halmämmedow, Gurbannazar Ezizow we Atageldi Garýagdyýew – kompozitor, şahyr we aýdymçy – olaryň hersine asmandan ylham gelipdir. Bir söhbetdeşlikde Atageldi Garýagdyýew Nury Halmämmedowyň Gurbannazar Ezizowy aýdym-saz mekdebiniň mahmal sesli okuwçysy bilen ilkinji gezek tanyşdyryşyny ýatlady. Kimiň ýanynda, kim bilen deň hatarda durandygy ýadyna düşende, Atageldi Garýagdyýewiň gözüniň öňi ümezläp gidipdir! Polat Mämiýew bir eserde türkmen halkynyň üç zehinli ogluny örän ysnyşykly birleşdiripdir.

«Oguzlar» – heýkeltaraş Gylyçmyrat Ýarmämmedow öz eserini şeýle atlandyrypdyr. Ahalteke bedewini ezberlik bilen çapyp barýan aýakýalaň ýigdekçe tutuş durky bilen oguzlaryň ähli şöhratly döwrüni janlandyrýar. Atçaparyň çakganlygy we ata doly erk etmegi özünde jemleýän umumy keşbi türkmen taryhyna oguz döwri hökmünde giren tutuş bir döwre suratkeşiň beren häsiýetnamasyna öwrülipdir.

Bitaraplyk baýramyna bagyşlanan sergi bu ýere gelenleriň hemmesine uly lezzet berdi.

Bitaraplyk güni mynasybetli surat sergisi (turkmenistan.gov.tm)