HABARLAR
TÜRKMENISTANYŇ WEKILIÝETI GURLUŞYK IŞLERI BOÝUNÇA HÖKÜMETARA GEŇEŞINIŇ MEJLISINE GATNAŞDY
Türkmenistanyň wekiliýeti Garaşsyz Döwletleriň Arkalaşygyna agza ýurtlaryň gurluşyk işleri boýunça Hökümetara geňeşiniň Kazanda geçen XLIII mejlisine gatnaşdy. Bu çäre II Halkara gurluşyk çempionatynyň çäginde gibrid görnüşinde geçirildi.
Wekiller Arkalaşyga girýän ýurtlaryň gurluşyk pudagynda halkara hyzmatdaşlygyny pugtalandyrmaga goşant goşýan ägirt uly mümkinçiligini belledi. Şunuň bilen baglanyşyklylykda, wajyp ykdysady meseleleri çözmekde gurluşyk işleri boýunça Hökümetara geňeşiň çägindäki özara gatnaşyklaryň ähmiýeti nygtaldy.
Nyrhlary emele getiriş ulgamlaryny kämilleşdirmek meselelerine aýratyn üns berildi. Şeýlelikde, Hökümetara geňeşiň garamagyndaky nyrhlary emele getiriş boýunça komissiýa GDA agza ýurtlaryň gurluşyk işlerinde nyrh babatyndaky baş ýörelgesiniň taslamasyny işläp düzmek tabşyryldy.
Mejlise gatnaşanlar GDA-nyň 2030-njy ýyla çenli ykdysady ösüş strategiýasynyň birinji tapgyryny (2021 – 2025 ýyllar) durmuşa geçirmek boýunça Hereket meýilnamasyna laýyklykda döwletara resminamalaryň taslamasynyň işlenip düzülmegi we ýöriteleşdirilen esasy guramalaryň roluny güýçlendirmek meselesini-de gozgadylar. GDA agza ýurtlaryň ýer titremesine çydamly gurluşyk pudagyndaky esasy edarasynyň başlygy geňeş agzalaryna gurluşyk kadalarynda ýertitremä çydamlylygy goldamak üçin, howp kartasyny düzmegiň geljegi barada habar berdi.