DÄP-DESSURLARY DOWAM ETDIRIJI: SAZANDA BAÝRAMMYRAT SÖÝÜNOWYŇKYDA MYHMANÇYLYKDA

Nebit-gaz toplumynyň Aşgabatdaky Medeni-işewürlik merkezinde her gün dutaryň özboluşly sesini we bagşylaryň aýdymyny “jähekleýän” gyjagyň owazy ýaňlanýar. Türkmen sazynyň muşdaklarynyň  çuňňur söýgüsini gazanan bu  milli halk saz gurallary ansamblyna Türkmenistanyň halk artisti, gyjakçy Baýrammyrat Söýünow ýolbaşçylyk edýär.    

Çagalykdan kalbynda halk sazlaryna söýgi beslän bu sazanda  ýigit diňe bir gyjaga däl, eýsem dutara, gargy tüýdüge, gopuza, dilli tüýdüge-de erk edýär. Ýöne kalbynyň gyjagyň liriki heňlerine berlendigini weli aç-açan boýun alýar. Tanymal sazandanyňkyda myhman bolup, biz onuň döredijiligi barada gaty köp gyzykly zatlary bildik. 

Baýrammyradyň sahna tarap uzap gaýdan ýoly kakasynyň hem-de atasynyň  dutarda we gyjykda saz  çalyp adamlaryň alkyşyny alan  ýeri  ─ Gökdepe etrap merkezinde başlanypdyr. Onuň aýtmagyna görä, saza bolan tebigy ukyp oňa atasyndan miras geçipdir. Mekdebi tamamlan sazanda obanyň medeniýet öýünde işläp başlaýar, soňra-de basym şol medeniýet ojagynyň ýolbaşçysy bolýar. Bu ýerde-de Baýrammyrat özüniň durmuş ýoluna wepaly  ýoldaş bolan litwaly gyz Reda duşýar. 

… Reda Türkmenistandan  alysdaky  Şwekşina atly litwa şäherjiginde dogulýar. Ol ejesi bilen bilelikde her ýyl Mary welaýatyndaky Baýramaly şäheriniň  böwrek kesellerini bejerýän şypahanasyna  gelýän ekeni. Mekdebi tamamlansoň ol Wilnýusyň  taryhy  uzaklardan başlanýan adybelli uniwersitetine  okuwa girýär. Reda bu gadymy ýokary okuw jaýynda iki ýyl okansoň, bilimini  Aşgabat şäherinde  dowam edýär. Çünki Orta Aziýanyň gurak hem-de yssy howa şertleri Redanyň saglygy üçin tapylgysyz dermanyň ýerini tutýar.

Şeýlelikde, 1985-nji ýylda  Türkmenistanda agzybir, bagtly hem-de internasional maşgalalaryň ýene-de biriniň sany artýar. Ýaşlar Türkmenistanda işleýärler we ýaşaýarlar, her ýyl zähmet rugsadyny bolsa  Baltik deňziniň kenaryndaky salkyn ülke Litwada geçirýärler.  

Sazanda ýigit Baýrammyrat litwaly gyz Reda ikisiniň başynyň çatylmagyny ykbalyň özüne beren  bagt paýy diýip düşündirýär. 

–  Reda ikimiz ruhumyz boýunça birek-birege gaty ýakyn adamlar. Oňa  söýgüniň iki taýynyň birleşmeginiň mysaly hökmünde garamak mümkin – diýip, Baýrammyrat gürrüň berýär. – Biz bir-birimizi gowy tanamyzdan soňra  nikalaşyp, durmuş toýuny tutduk. Iki çagamyz dünýä indi. 

Men medeni aň-bilim tehnikumyny gaýybana tamamladym, dürli şäherlere we ýurtlara konsert bermäge köp gitdim. Maňa  gyjak çalmagyň inçe syrlaryny halypam, Türkmenistanyň halk artisti Ata Ablyýew öwretdi. Türkmenistanyň Döwlet teleradiosynyň Türkmenistanyň halk artisti Akmyrat Çaryýew tarapyndan  ýolbaşçylyk edilýän halk saz gurallary ansamblynda  köp  wagtlap işledim, 2007-nji ýylda bolsa özüm Nebit-gaz toplumynyň medeni merkezinde halk saz gurallarynyň täze toparyny döretdim. Häzir onuň çeper ýolbaşçysy. Bu ýere Türkmenistanyň iň atly bagşy-sazandalary we gelejegine uly umyt döredýän ýaş zehinleri jemlendi. 

Topar konsertleri, çykyşlary yzygiderli alyp barýar, türkmen halkynyň baý saz däplerini ösdürmek we halkyň içine  ýaýratmak bilen meşgullanýar, şeýle-de, ýygy-ýygydan telegepleşiklere gatnaşýar.  

Türkmenistanyň halk artisti, Prezidentiň “Türkmeniň altyn asyry” baýragynyň eýesi, Baýrammyrat Söýünow ömrüni maşgalasyna we saza bagyşlady. Artistiň pikiriçe, dogry ýola düşüp, saýlap alan  sungatyna we adamkäçilik borjuňa  wepaly  bolup galsa, her bir adam  öz durmuşynda üstünlik gazanyp biler. 

Swetlana ÇIRSOWA

Däp-dessurlary dowam etdiriji: sazanda Baýrammyrat Söýünowyňkyda myhmançylykda (turkmenistan.gov.tm)