HABARLAR
ÝAPONIÝADA TÜRKMENISTANYŇ GARAŞSYZLYGYNYŇ 30 ÝYLLYGY WE BITARAPLYGYNYŇ 25 ÝYLLYGY MYNASYBETLI MASLAHAT GEÇIRILDI
2021-nji ýylyň 8-nji iýulynda Türkmenistanyň Ýaponiýadaky Ilçihanasynyň we Ýapon-Türkmen parlamentara dostluk toparynyň bilelikde gurnamagynda Ýaponiýanyň Parlamentiniň binasynda Türkmenistanyň Garaşsyzlygynyň 30 ýyllygy, baky Bitaraplygynyň 25 ýyllygy mynasybetli maslahat geçirildi.
Bu çärä Ýaponiýanyň Parlamentiniň deputatlary, Daşary işler, Ykdysadyýet, söwda we senagat, Adalat ministrliginiň yolbaşçylary we wekilleri, Ýaponiýada bilim alýan türkmen talyplary hem gatnaşdy.
Maslahatyň dowamynda Türkmenistanyň Ýaponiýadaky Ilçisi G.Elýasow, Ýaponiýanyň ozalky Premýer-ministri, Ýaponiýanyň Parlamentiniň Wekiller palatasynyň deputaty Sindzo Abe, Ýapon-Türkmen Parlamentara Dostluk toparynyň sekretariatynyň başlygy Matsuşita Şinpey we beýleki birnäçe wekiller çykyş etdiler.
Maslahatyň çaklerinde Türkmenistanyň Prezidentiniň 2020-nji ýylyň 11-nji dekabrynda çykaran Permanyna laýyklykda, Türkmenistanyň garaşsyzlygyny, özygtyýarlylygyny we hemişelik Bitaraplyk hukuk ýagdaýyny pugtalandyrmakda, ata Watanymyzyň halkara derejesindäki abraýyny berkitmekde bitiren hyzmatlaryny nazara alyp, şeýle hem Türkmenistanyň Bitaraplygynyň 25 ýyllyk şanly baýramy mynasybetli “Türkmenistanyň Bitaraplygynyň 25 ýyllygyna” atly Türkmenistanyň ýubileý medaly bilen sylaglanan Sindzo Abä bu ýokary sylag dabaraly ýagdaýda gowşuryldy.
Jenap Sindzo Abe özüne berlen bu ýokary sylaga çuňňur hormatyny bildirip, Türkmenistanyň Prezidentine we Türkmenistanyň Hökümetine çäksiz minnetdarlygyny beýan etdi we gelejekde hem iki ýurduň gatnaşyklarynyň ösdürilmeginde öz tagallalaryny gaýgyrmajakdygyny aýtdy.