HABARLAR
ŞALY ORAGY DOWAM EDÝÄR
Türkmenistanyň demirgazygynda şaly oragy ýokary depginde dowam edýär. Jogapkärçilikli döwürde öndürijiligi ýokary bolan 120 sany häzirki zaman kombaýny we galla daşamak üçin ýüz töweregi ýük ulagy işleýär. Bu ýyl Daşoguz welaýatynda şaly meýdanlary ýene-de sekiz müň bir ýüz gektar ýeri eýeledi, şondan daýhanlar otuz bäş müň tonna şaly hasylyny ýygnamagy maksat edinýärler. Ajaýyp tagamly, ýokary hasyllylygy we kesele durnuklylygy netijesinde, sebitde aýratyn baha mynasyp bolan «Müňbaşy», «Nüküs-2», «Alenga» we «Bereketli» ýaly saýlama tohumlaryň bol hasyly ösdürilip ýetişdirildi. S. Türkmenbaşy etrabynyň ýöriteleşdirilen iki hojalygynyň şalyçylary bu ekiniň esasy öndürijileridir. Bu ýerde, sebitiň şaly meýdanynyň golaýynda ýurduň sarp edijilerini ýylda halkara ülňülerine laýyk gelýän ýokary hilli 30 müň tonna şaly bilen üpjün etmäge we daýhanlar üçin zerur tohumy taýýarlamaga ukyply bolan tehnologiýaly tüwi arassalaýjy kärhana ýerleşýär.
Daşoguz welaýatynyň ykdysadyýetinde möhüm orny eýeleýän gallaçylyk oba hojalygynyň ösen pudaklaryndan biridir. Sebit ýeterlik mukdarda bugdaý, arpa, mäş, künji, noýba we beýleki däneli hem kösükli ekinleri ösdürip ýetişdirýär. Döwlet maýa goýumlarynyň hasabyna döredilen zerur enjamlaryň ýeterlik parkynyň we ýetişen önümleri saklamak hem gaýtadan işlemek üçin ýöriteleşdirilen desgalaryň gurulmagy netijesinde, bu pudak tohum materiallaryny taýýarlamakdan başlap, ahyrky taýýar önüm öndürilýänçä, dowam etdirmek bilen, doly önümçilik tapgyryny üstünlikli geçýär. Gallaçylygy mundan beýläk-de ösdürmegi, ýer we suw baýlyklaryny tygşytly peýdalanmagyň, öňdebaryjy ylmyň gazananlaryny we dolandyryş usullaryny iş ýüzünde netijeli ornaşdyrmagyň hasabyna amala aşyrmak göz öňünde tututlýar.