«AHAL» IKINJI GEZEK TÜRKMENISTANYŇ FUTBOL FEDERASIÝASYNYŇ KUBOGYNY EÝELEDI

«Ahal» topary Türkmenistanyň Futbol federasiýasynyň kubogyny özünde alyp galdy. «Türmennebitönümleri» Baş müdirliginiň toparçasy aýgytlaýjy oýunda geçen ýylky milli çempionatda 3-nji orny eýelän Türkmenbaşy şäheriniň «Şagadam» toparyny 2:0 hasabynda utup şeýle üstünlik gazandy.

Duşuşyk «Aşgabat» stadionynyň ätiýaçdaky meýdançasynda geçirildi. Arslanmyrat Amanowyň (8-nji minutda 11 metrlik jerime urgusyndan) we Mirza Bernazarowyň (13-nji minutda) geçiren pökgüleri Türkmenistanyň wise-çempionyna ýeňiş getirdi.

«Ahal» bassyr ikinji gezek Türkmenistanyň Futbol federasiýasynyň kubogyna mynasyp boldy. Ony bu üstünlige toparyň baş tälimçisi, iň ýokary tälimçilik PRO derejesiniň eýesi Röwşen Muhadow ýetirdi.

«Ahal» ýaryşyň alty oýnunda garşydaşlarynyň derwezesine 16 pökgi geçirse-de, özüniňkä bir pökgem goýbermedi. AFK- 2022-niň Çempionlar ligasynyň finalyna gatnaşan «Ahal» «Merw» bilen 0:0 hasabynda deň oýnady, soňra «Nebitçini», «Köpetdagyň» ätiýaçdaky düzümini we Türkmenistanyň Olimpiýa ýygyndysyny (U-23) şol bir hasap bilen – 4:0, ýarym finalda «Aşgabady» 2:0 hasabynda utdy.

«Aşgabat» topary-da 3-nji orun ugrunda oýunda Balkanabadyň «Nebitçisini» 2:1 hasabynda utup, bassyr ikinji gezek ýaryşyň bürünç baýragyny eýeledi. Duşuşygyň birinji ýarymynda Merdan Muhadow hasaby açdy. Arakesmeden soň balkanabatlylar hasaby deňlediler – 1:1. Merdan Gurbanow 11 metrlik jerime urgusyndan «Aşgabada» ýeňiş getirdi.

https://turkmenistan.gov.tm/tk/habar/64755/ahal-ikinji-gezek-turkmenistanyn-futbol-federasiyasynyn-kubogyny-eyeledi